Psikolojia (Honoin) Ne’ebe Kritiku: Hafraku Povu Aileba Luta Hasoru Covid-19 iha Timor-Leste

Hakerek nain: Franzelino T. S. Soares (Aileba)


Povu Aileba, imajen husi: Aileba

Hafoin estadu Timor Leste liu husi Presidenti Republika (PR) iha Marsu 2020 ofisialmente dekreta Estadu Emerjensia (EE) ou State of Emergency nudar faze dahuluk ba prevensaun krizi pandemia / surtu Covid-19 ne’ebe afetadu ba mundu tomak.

Implementasaun Estadu Emerjensia (EE) rasik iha ne’ebe governu toma ninia resposabilidade ba asaun politika imediatamente hodi responde ba situasaun emerjensia ruma, hanesan vigora ona iha konstituisaun RDTL no aktu konkreta ne’ebe iha mak hanesan implementa sistema lockdown ba movimentu ema tama mai liu husi aeroportu, portu, fronteira terestre; inklui ba transporte publiku no mos aplika distansia sosial  ba iha teritoriu Timor Leste. Asaun hirak nee nudar maneira hodi halo prevensaun hasoru  pandemia Covid-19. Hodi nune’e Estadu Emerjensia (EE) mos fo kedas  ninia impaktu ba sidadaun sira labele asesu total ba aktividade  sira hanesan: Servisu, Edukasaun, Saúde, Relijiaun no Kultura nsst nudar direitu fundamental  hanesan preve ka hatuur ona iha konstituisaun  RDTL no liu husi artigu 25 alina 1 ne’ebe hateten “Lei de’it maka bele hapara direitu, liberdade no garantia fundamentál wainhira iha estadu serku eh estadu emerjénsia nia laran, tuir Lei-Inan haruka’’, kondisaun ne’e lori kedas Timor-oan liu-liu povu Aileba sira ba iha situasaun ne’ebe ho espasu limitadu ba direitu liberdade sosial tuir lalaok ka regulamentu ba estabelesimentu Estadu Emerjensia bazeia ba dekretu lei No. 3/2008 estadu Timor Leste.

Alende Sistema lockdown no distansia sosial, informasaun husi rumoris oinoin husi media ne’ebe kuaze espalla iha mundu tomak kontinua husu ba sidadaun hotu atu ‘’no Panic!’’ labele paniku. Maibe na realidade ema barak mak kontinua paniku, inklui mos ema husi  nasaun mais avansadu. Ezemplu balu husi asaun paniku mak hanesan sidadaun sira  to’o hanahas sasan baziku sanitasaun nian iha loja, ne’e nudar fator ida ne’ebe kontribui tebes ba hafraku mentalidade ema nian hasoru pandemia  refere.

Iha Timor Leste, pandemia Covid-19 ne’e mos hafraku ema nia mentalidade. Maibe iha maneira husi estadu atu halo sidadaun sira labele tauk. Husi ne’e, ezemplu ida mak informsaun ne’ebe loron-loron fosai husi media nasional sira durante Estadu Emerjensia (EE), fo kona ba korajen husi sidadaun  Aileba ‘’kbi’it laek’’ sira nia sentimentu hodi hateten latauk hasoru Covid-19. Ezemplu seluk mak, iha teritoriu laran antes implementasaun Estadu  Emerjensia, povu Aileba sira hamutuk ho autoridade kutural ‘’Lia-Nain’’ husi munisipiu balu hahu ona mai ho komitmentu hodi mantein orientasaun ba asaun kolektivu hasoru Covid-19 ka virus invizibel refere liu husi esforsu ba fiar kultural. Mesmu la-iha hanoin tauk, maibe sira tauk liu mak hamlaha. Tauk hamlaha ne’e bele atu oho sira iha situasaun Estadu Emerjensia (EE) nia laran.

Iha situasaun real, tuir dadus husi Organizasaun Saude Mundial / WHO katak Covoid-19 ne’ebe iha oras ne’e dadauk hamate ona ema kuaze 212,580 (iha nivel global) husi nasaun sira ne’ebe afetadu , nune’e halo ema barak mak paniku tantu klase mediu, rikasu ka osan-nain sira, elitiku no nai-ulun ka mahukun nasaun sira mos tauk. Iha nivel nasional, numeru suspeitu ba covid-19 ne’ebe sae signifikante liu ema 2 ba leten iha fulan Abril nia laran tuir dadus ne’ebe fo sai husi ekipa Centru Integradu Jestaun Krizi (CIJK), situasaun ne’e indika ka hatudu inkonveniensia ba timor-oan liu-liu povu Aileba sira oinsa atu iha esperitu ne’ebe forti nafatin hodi luta ba hamlaha no hasoru pandemia Covid-19 ne’e rasik.

Maibe, tansa mak iha Timor-Leste, povu Aileba manisfesta sira ninia hanoin hodi hateten sira latauk? Karik ida ne’e nudar aktu emosaun ne’ebe refleta ba sira nia moris ne’ebe nakonu ho susar no terus, liu-liu hapara sira nia aktividade hanesan (normal activity) bainbain ba sustenta nesesidade.

Povu Aileba reprezenta ka nudar klase (working class) ki’ik husi estrutura moris sosiedade kapitalismu ne’ebe iha no nune’e hamlaha hanesan krizi alimentasaun ida ne’ebe bo’ot (eternal) nanis ona iha povu Aileba nia moris lor-loron kompara / kontraditoriu ‘opposite’ ho klase seluk (klase mediu, rikasu ka osan-nain, elitiku, nai-ulun ka mahukun) ne’ebe existi wainhira sistema ukun (Kapitalismu) hahu implementa no laos foin hahu husi ameasa pandemia global ne’e.

Covid-19 nudar mos kontinuasaun elementu ida hodi reforsa ameasa krizi global ba iha povu Aileba sira nia moris, hanesan iha ne’ebe mosu ‘stagnasaun ekonomia’  ba povu Aileba ne’ebe barak liu dependente ba aktividade negosiu (micro-economic) ki’ik ka dala ninin. No Covid-19 hahu hafraku luta koletivu, relasaun sosial entre ema no esperansa moris diak ema nian sai mihis, anti-solidariedade, rasismu, tauk, paniku, hirus mak domina no buras, loke espasu klean ba ema atu hatoman-aan ho utilizasaun hand-sanitizer, masker ba oin no hanahas toilet paper, interese-an duke tulun malu ba ida nia servisu no kaer liman ba malu troka ona ho haketak malu liu husi distansia sosial /social distance.

Realidade sei-la bosok durante ne’e povu Aileba rasik observa no nota katak antes seidauk ameasa pandemia Covid-19 situasaun ne’ebe  hatudu husi sistema ukun iha Timor Leste lori ona povu Aileba sira ba kondisaun ne’ebe ‘oppressed’ kiak no muki’it tebes ho hahalok  ne’ebe hatudu husi ukun-nain sira ka mahukun rai nian ne’ebe povu tomak fo fiar liu husi lejitimidade demokrasia ne’ebe orienta liu ba ka habokur  ho dutrina kapitalismu, iha ne’ebe hamosu klase sosial ba sosiedade, la iha balansu ba distribuisaun rekursu, hakonu obrigasaun (alienates) esplorasaun, deszentendimentu sosial ka konflitu entre klase, la-hanaruk ‘self-destructive’ moris, nune’e refleta ba situasaun iha ne’ebe povu Aileba lasenti katak sira hetan subordinadu ka espremidu makas husi sistema ukun kapitalismu, nune’e buat hirak ne’e hatudu tebes injustisa sosial iha sosiedade nia laran.

Ameasa husi horok aat ka pandemia Covid-19 ne’e kontinua deit atu haterus no hamate tan povu Aileba sira no kondisaun hirak ne’ebe mak estadu Timor Leste iha sei la garante totalidade kuandu wainhira iha kondisaun grave ka afetadu makas tebes husi krizi pandemia refere.

 Referensia

GMNTV (Marsu, 2020) Bele asesu iha <https://gmntv/en/sosiedade/2020/03/timor-leste-vigora-estadu-emerjensia-durante-fulan-ida&gt;

Livru Kontituisaun RDTL versaun Tetun: Bele asesu iha <http://timor-leste.gov.tl/wp-content/uploads/2010/03/Constituicao_RDTL_TT.pdf>

http://www.tatoli.tl/2020/03/27/aplikasaun-estadu-emerjensia-sei-fo-sai-hosi-dekretu-governu/

https://dictionary.cambridge.org/english/state-of-emegengy

Žižek, Slavoj. (2020). Pandemic: Covid-19 Shakes the World. New York and London: OR

https://www.academia.edu/@franzelinosarmento/covid-19-virus-invizibel-no-kbi’it-lulik

https://www.worldometers.info/coronavirus/?utm_campaign=homeAdUOA?si

View at Medium.com

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: