Reflesaun COVID-19: Politika “ideal” Versus Politika “real” iha Estadu da Emerjensia (EE) nia laran.

Artigu ida nee nudar reflesaun individual hodi ilustra kronologia lalaok situasaun politika no prevensaun virus corona iha rai laran. Reflesaun ida nee notadu husi situasaun real konaba ba idealisme prevensaun COVID-19 husi politiku nain sira ne’ebe nakfila sai interese partidu politiku sira nian iha situasaun Estadu Emerjensia daruak nia laran.

Fontes husi : GMN TV

Surtu COVID-19, wainhira komesa espala tama mai iha Timor-Leste hamosu atensaun Timor-oan ho tauk no preukupa ba moras ida nee. Moras nee nia daet lalais deit husi ema-ba-ema liu husi fanin, mear. Iha parte balun, virus nee mos hadaet liu husi ema (nudar medium) hodi hadaet ema seluk. Tuir esplikasaun mediku katak, virus bele belit iha ema nia isin lolon no moris durante 14 nia laran.

Alende virus daet iha tenpu badak, nune’e mos laiha aimoruk atu kura. Maibe tuir mediku sira, wainhira ema ruma kona ou positivu husi COVID-19, moras nee bele kura rasik liu husi dalan hasae imunidade isin para bele kontra virus nee. Mesmu imunidade nee sai fator principal hodi kontra virus, maibe realidade hatudu katak kuandu ema ne’ebe idade avansadu, ou hetan moras kroniku ruma, sira nee mak sai vulneravel liu. Iha nasaun barak hatudu katak, kategoria ema sira nee mak mate barak. Ezemplu hanesan iha rai China, Italia, Inglatera, Estadu Unidus da Amerika, Iraun no nasaun seluk, situasaun nee halo ema tauk tebes. Balun preukupa los oinsa atu bele prevene no ultrapasa situasaun hanesan nee iha Timor-Leste.

Maneira prevensaun COVID-19 iha Timor-Leste

Relasioana ho kurtu COVID-19 ne’ebe sai moras pandemiku, iha Timor-Leste hahu husi maijumenus dia 22 de Marsu 2020, Timor-Leste komesa aplika ona karantena obrigatoriu. Ema hotu-hotu ne’ebe mai husi rai liur presija tama iha karantena durante loron 14 nia laran. Depois ida nee, mediku sira sei foti amostra no teste iha laboratorium, kuandu resultadu negativu ba COVID-19, sira bele ba uma, reintegra ho familia. Maibe mos mediku sira sei kontinua halo monitorizasaun se mosu sintomas ruma bele halo intervensaun lalais.

Iha parte ida, karantena obrigatoriu nudar sai dalan diak ida atu prevene espalamentu virus corona. Maibe, presija mosregula movimentu ema nian tanba nee governu halo politika ida hamosu “Estadu Emergensia-(EE) atu bele kontrola movimentu cidadaun sira. Iha parte seluk, EE nia laran, iha regulamentu balun ne’ebe hatu’ur iha dekretu lei no 3/2020 hodi limita sidadaun sira nia direitu principal balun. EE mosu ho objetivu atu reforsa padraun organizasaun saude mundial nian kona-ba maneira prevensaun COVID-19 tuir interese saude da publiku nian. Iha maneira prinispal tolu mak sai xave inportante: Limita movimentu ema nian no mantein ho distansia sosial; Abitua ho diplina no maneira Hijiene; Uza maskara iha publiku. Iha mos regulamentu seluk ne’ebe hanesan servisu publiku sira para total no troka ho maneira online ou uza internet no distansia dook.

Husi observasaun ne’ebe hau halo, kuaje hahu husi inplementasaun EE permeiru iha dia 28 de Marsu too 28 de Abril, governu hahu ho kontrola rigorousu. Maneira distansia sosial, uza maskara, halo hijiene, limita limitasaun no halibur malu, bandu transporte publiku sira tuir duni nia dalan. Alende implementasaun EE ne’ebe lao diak, iha semana permeiru ekipa linha de frente (Frontline) sira mos servisu ho dedikasaun no esforsu maka’as kontibui sira nia-an ba servisu risku ida nee.

Politika dedikasaun kombate surtu COVID-19

Alende servisu ho esforsu tomak husi linha frente (Frontline) sira, politika nain sira mos ho aten brani tau interese saude publiku nia hodi asegura katak COVID-19 nee presija prevene duni. Laos ho esforsu politika deit, maibe mos iha kompromisiu politiku ho vontade ideal. Hanesan iha parlementu, membru parlementu sira hakarak aloka no kua sira nia salariu 50% ba funsionariu no ekipa sira ne’ebe servisu iha frontline. Governu mos promete ba publiku atu fo osan subsidiu ba sidadaun, hanesan atu fo (100$ kada uma kain, fo ajuda kreditu ho laiha funan ba kompana sira, fo subsidiu ba trabaldor sira). Buat hirak nee nudar pakote asistensia sosial no ekonomia ne’ebe fo vantajen mai povu. Maibe ideas hirak nee seidauk implementa, foin mak hahu implementa subsidiu fahe pulsa gratuita ho 15$ kada uma kain ida iha fulan Marsu.

Vontade politika seluk mos mai husi Permeiru Ministru (PM), nia kria ekipa ne’ebe bolu Centru Integradu Gestaun Crize (CIGC) hodi jere prosesu tomak husi prevensaun COVID-19 tuir padraun saude mudial nian. Laos nee deit, iha moos politika governu nia atu halo ezekusaun orsamentu hodi asegura prevensaun COVID-19. Ho ideliasme politika ho vontade diak, Permeiru Ministru tuir lolos nia demite (hakotu) ona nia kargu nudar permeiru ministru tanba mosu impase politku enfrenta husi koligasaun AMP nian (AMP I nakfera/mosaun laiha konfiasa). Maibe, PM tenke fila fali retira nia kargu tanba ho objetivu idealismu ne’ebe haforsa nia atu asume nia kargu fila fali hodi servisu kombate COVID-19. Ate nia tenke sakrifika nia ekipa iha governu dawalu, ezemplu PM demite ministra da saude nia kargu tanba sente iha falansu balun, no fo fiar tomak ba ekipa foun ne’ebe hanaran Sentru Integradu Gestaun Crize (CIGC) hodi jere COVID-19.

Durante PM lidera hamutuk ho ekipa (CIGC)  hodi prevene COVID-19, realidade hatudu buat barak lao diak. Ema hotu kumpri regras EE no prevensaun COVID-19 nian, prosesu kuarante lao diak. Governu liu husi ekipa (CIGC) halo kontinuasaun kontrola no jere karantina obrigatoriu ba maluk sira ne’be mai husi rai liur. Teste ba ema sira iha quarantena, fornese informasaun divulgasaun kona-ba prevensaun COVID-19 no atualiza numeru quarantena obrigatoriu, liu-liu konaba kazu positivu sira, numeru ema sira ne’ebe mak pasa ona husi karantena. Nune’e mos, vontade seluk mak hanesan politika subsidiu atu ajuda sidadaun sira. Buat hirak ne’e hotu nudar maneira ida ne’ebe ho laran luak husi PM ministru no ekipa husi governu hodi tau atensaun masimu ba prevensaun surtu COVID-19 no kompensasaun sosial ba sidadaun sira.

Wainhira tama ona fulan ida nia laran, EE faze permeiru remata iha 26 de Abril 2020, PM konvense membru parlementu sira atu kontinua ou extende EE tanba iha posibilidade numeru moras positivu husi COVID-19 bele aumenta sae. Iha apresentasaun proposta hodi extende EE iha parlementu, PM fo mos fo ilustrasaun balun ho kalkulasaun se kuandu numeru ema ne’ebe afetadu husi COVID-19 sae, maijumenus perpasaraun saida mak presija. Tanba ne’e parlementu mos vontade politku diak, sira halo esforsu ne’ebe lalais tebes hodi aprova orsamentu ho montante Milhaun $250 ne’ebe aloka (milaun $150 ba prevensaun COVID-19) nomos extende EE (EE-daruak) hodi kontinua halo intervensaun no prevensaun COVID-19.

Politika ideal nakfila sai interese de poder

Loron ba loron, tama ona kuaje fulan ida ho balun, realidade hatudu oin seluk, ikus-ikus nee saida mak akontense iha EE segundu nian sai visivel. Politiku nain sira ho fofoun mai ho idealisme politiku atu lori interese povu nian hodi kombate no prevene COVID-19, maibe ralidade lao oinseluk. Politiku nain sira komesa hahu halo jogo de politiku hodi atinje interese politiku. Situasaun ida nee fo hanoin fila fali mai ita sientista politiku, Harold Lasswell ne’ebe nia define katak politiku nee sai nudar kompetisaun kona-ba “semak hetan, wainhira no oinsa” (Politics as a competition about who gets what, when, and how).

Situasaun ida nee akontese agora dadauk iha governu ida nee. PM ministru komesa hases (fahe) nia konsentrasaun ba COVID-19, nia komesa kolia halo politika oinsa atu mantein nia poder atu ukun. Formasaun koligasaun partidu politiku sira komesa sai polimeka, iha kompetesaun jogus politiku. Nune’e mos komesa partidu boot sira kompete malu hadau partidu ki’ik sira atu hamutuk (sai ai tonka bamalu); komesa sira lobi partidu politiku seluk halo koligasaun hodi kaer ukun governu ida nee. Iha parte ida, partidu politiku sira mos komesa du’un malu, hatoo keisa ba tribunal de rekursu tanba ladun satisfaz ho decisaun Presidente da Republika ne’e ema deskonfia katak nia la imparsial no “viola konstitusaun da RDTL”.

Iha parte seluk, parlementu mos komesa halo politika ho motivasaun atu halo boikot, trava malu tanba ho argumentu katak la tuir rezime parlmentar. Partidu politiku balun komesa kestiona kestaun indisplinaria tanba plenaria iha parlementu abandonadu. Situasaun ida nee mos konvoka jurista sira, matenek nain sira nia hanoin, sira hahuu diskuintidu sobre “brecha política” (political gap) iha rai laran . Aktivista politiku, analizador politiku no jurista ida-idak interpreta konstitusaun RDTL ne’ebe liga ba direitu, responsabilidade no dalan normativu ba partidu politiku sira nomos prosedura  normativu tuir konstitusaun RDTL atu forma governu hodi ukun nia lalaok legal sira.

Preukupasaun PM nia iha politika de poder, hamosu situasaun tense politiku iha rai laran. Sidadaun sira mos komesa nota ona, observa no analiza situasaun politika real ne’ebe akontese. Maibe kestaun seluk mak sidadaun sira responde situasaun politik ho “sensaun apatia”. Sira komesa ladun iha displina ba regulamentu sira no padraun prevensaun COVID-19 nian. Ema komesa ladun respeita ona maneira distansia sosial, uza mascara no kontinua ho maneira hijiene. Karik situasaun drama politika (hadau interese politika) ne’ebe hatudu husi partidu politiku, no politikus nain sira nee mos fo sinal negativu ba konfiansa de publiku. Ema komesa hanoin no interpreta katak karik COVID-19 nee mos lori vantajen politiku, tanba EE prolonga hodi fo oportunidade ba politikus sira hodi atinje sira nia interese politika. No nafatin bazeia ba argumentu tuir Harold Lasswell karik nee relevante no loos ho situasaun politiku “when” there is an opportunity, it is the right moment” atu halo jogadas politika hodi hetan poder..

Situasaun kompetisaun politiku ho interese partidu politiku ne’ebe akontese fo influenza boot ba povu nia konfiansa ba sira nia lider politiku sira. Sa tan iha situasaun agora, sira halerik hela tanba EE fo amesa boot ba sira nia moris, sira hamlaha, laiha servisu, laiha rendimentu; buat hirak nee hamosu problema multidimensional ne’ebe fo amesa ba sira nia vida. Iha parte seluk, direitu fundamental balun sira husik ou lakon tanba tenke kumpri EE no hakruk ba dekretu lei no prosedura prevensaun COVID-19.

Maibe iha kotuk, politika nain sira hatudu momos iha publiku hodi halo kompetisaun politiku ba hadau poder. Situasaun nee sai nudar dezaster boot ne’ebe politikus sira kria, nune’e mos halakon fiar ou konfiansa cidadaun ba sira nia nia lider politiku sira ne’ebe sira tau fiar tomak atu ukun. Nosaun (gagasan) idealisme politiku atu hamate no kombate COVID-19 sai hanesan lembrasa politika iha povu nia terus no matawen. Ita kuandu akompana iha midia sosial, televisaun no radio, povu tanis, halerik, hakilar tanba kesi kabun, hamlaha. Maibe ita akonpanha hamutuk katak politiku nain sira hakilar hatudu liman fuan ba malu hadau poder hodi ukun iha situasaun Estadu da Emerjensia (EE) ba prevensaun kurtu COVID-19. Tanba nee EE hamosu twin interest, iha parte balun atu kombate COVID-19 no parte seluk hodi kria oportunidade hodi kompetisaun politiku de poder hodi atinje sira nia interese duku povu nia interese.

Ikus liu ho mosaun konfiansa cidadaun sira ba sira nia governu komesa mihis tanba situasaun jogu de politiku hatudu momos iha politika riil. Ate-parese povu sente laiha lider, laiha aman, laiha ona ema ne’ebe sira merese tau fiar. Promesa politiku atu fo subsidiu, fahe hahan, osan, povu hein nunka realiza. Povu tanis ho mataween tanba hamlaha iha situasaun EE no prevensaun COVID-19.

Situasaun lakon konfiansa no la kumpri regras prevensaun COVID-19 mos bele hamosu risku boot, moras COVID-19 bele daet boot se kuandu povu hamlaha sira sei la fiar ona regras sira iha EE. Tuir lolos, ukun nain sira kalma oituan lai, pasensia lai, konsentra lai ba prevensaun moras pandemia surtu COVID-19. Depois moras nee ultra pasa foin halimar jogus politku hodi realiza kompetisaun konaba ba ( who gets what, when, and how). Buat hotu ne’ebe akontese dadauk karik fo lisaun boot mai ita povu ki’ik ne’ebe agora terus, husi situasaun nee ita komesa refleta ita nia-an. Ukun-an iha kuaje tina 18, politiku rai laran hanesan nee, satan iha tenpu ita atu besik mate, hamlaha tanba sa mak interese politiku mak sai prinsipal duke interese povu? Hau nudar hakerek nain laiha resposta maibe hamosu perguntas reflektivu, situasaun ida nee loke ita nia neon, hanoin hodi halo reflesaun ba ita nia rai.

Celso Fonseca

Hakerek iha kalan, dia 7/5/2020. Artigu nee nudar reflesaun deit hodi ilustra pensamentu hakerek nain nian durante iha semana hira nia laran. Iha preukupasaun balun husi publiku katak povu hasoru susar, presija ajuda maibe politikus sira hatudu maneira politiku oin seluk, Nosaun (gagasan) idealisme politiku atu prevene, hamate no kombate surtu COVID-19 sai hanesan lembrasa politika iha povu nia terus no matawen. Situasaun ida nee kria reasaun negativu ho komunidade no komesa kestiona ho perguntas interese saida mak iha Estadu da Emerjensia nia kotuk?

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: