Rivalidade hanesan Futebolista: Lisaun ba Politiku nain sira iha Timor- Leste.

Istorikamente, Timor Leste nia politika hatudu katak Timor-oan hamutuk hodi kore-an husi korente invazor nian iha 1999; mesmu antes ne’e, Timor-oan balun, liu liu sira ne’ebe involve iha partidu politikus iha duni diverjensia iha periodu ne’eba. Maibe to’o momentu no faze ida Timor-oan konsege konjuntura politika ida deit hodi rona “Ordem Comando Da Luta”, ikus mai rezulta libertasaun patria nu’udar mehi naruk husi povu maubere.

Image may contain: 2 people

Luis Garcia dos santos
Estudante Finalista iha Relasaun Internasional – UNTL
Dadaun Hala’o programa internship RYLA –
TL nian  iha Centro Nacional Chega! I.P
Estudante Klasse Avansadu Direitu Umanus iha AJAR – TL
Luisgarciasantos6@gmail.com/ +670 77067177

Rezultadu libertasaun realiza iha konsulta popular liu husi votasaun iha 30 de agustu 1999.  Maske tuir rezultadu votasaun hatudu maioria hili independensia, maibe mos iha rivalidade entre Timor-oan ne’ebe, balun hili nia direitu politiku hodi integra ba funu maluk Indonesia. Biar nune’e, hirak ne’e sai ona istoria pasadu no ita halo ona rekonsiliasaun entre estadu rua, Timor Leste ho Indonesia. Objetivu husi asaun nasaun rua nee hodi halo tuir deit assuntu crucial sira ne’ebe koloka husi Komisaun Simu Malu, Lia – Loos no Rekonsiliasaun ka Comissão de Acolhimento, Verdade no Reconiliação (CAVR).

Bazeia ba pasadu, rekonsiliasaun foo lisaun ba  kontestu Timor Leste ida ohin, Politiku sira presiza aprende rivalidade hanesan Futebolista sira iha mundo futebol, katak durante jogu hala’o 90 minutus nia laran ou prolonga tempu ka lian inglés bolu extra time, jogador sira hatudu sira nia rivalidade ne’ebe forte no defensivu iha campo de futebol. Maibe depois de jogu termina, sempre iha rezultadu sira hanesan vencedor, impata no derrota.

Rezultadu hirak nee hamosu husi rivalidade, maibe laos antigonista ba malu. Hanesan mos politiku sira ne’ebe involve iha partidu politiku, banhira iha periodu Kampaña ba elisaun nasional parlementar, alastra sira nia estrategia politika kampaña nian. Estratejia hirak nee hodi hetan simpatia no ganha konfiansa husi eleitores maibe la signifika sai inimigu, parte seluk hatudu duni sintomas inimigu maibe ho estrategia politika, hodi bele sai vencedor ou derrota konforme ritmu no tatika iha arena politika durante periudu elisaun. Depois jogu remata, ba jogador sira konsidera malu hanesan kompatriota, maske iha duni adversariu ne’ebé defensivu iha kampu.

Iha parte balun, politiku sira, iha tempu elisaun remata, konsidera malu nu’udar kamaradagen, kompañeiru no kontinua hanesan familia no maun alin. Maibe, infelismente votu ne’ebe depozita husi eleitores sira ba partidu no politiku sira, e laos ho absolutamente maibe iha deit votus pedasuk ka votu rohan – rohan.

Ba politiku nain sira ne’ebe hola parte iha partidu politiku, tenki simu realidade akontese nu’udar resultadu ida husi kestaun tolu ho situasaun Timor Leste nian. Permeiru, buat ne’ebe hatuur ona iha konsitusaun Repúblika Demokratika Timor Leste (RDTL). Segundu liga ba prinsipiu demokrasia Ikus liu mak liga ba rivalidade Politika Iha ne’ebe Konstituisaun Repúblika Demokratika Timor Leste iha artigu hitu (7) alinea ida deskreve katak povu ezerse podér ho sufrájiu “universál, livre, igual, direitu, sekretu no periodiku” no ho meiu sira seluk ne’ebé konstituisaun preve. Laos legalidade iha Konstituisaun deit, maibe aktu ida ne’e nu’udar kuensekuensia ida husi estadu sira ne’ebe opta Demokrasia. Tamba ne’e tuir Schattscheneider (1942:42) nia prespetiva katak “Democracy is System a based on competation political parties and voters determine, as part outside the party’s system and organization”. Kestaun ikus liu tuir Firmanzah (2010: 33) fo nia konseitu Rivalidade Politika katak “konsep persaingan politik merupakan dapat memenangkan kompetisi pemilu sesuai dengan aturan dan ketentuan yang berlaku, dimana partai politik perlu memonitor dan mengevaluasi setiap strategi dan aktifitas yang dilakukan partai lain layaknya prinsip ‘zero sum’ setiap kemenangan dari satu pemain merupakan kekalahan dari pihak lain”.

Situasaun refere laos akontese deit iha Timor Leste maibe sai ona lisan baibain ho naturalmente iha kontestu demokrasia iha mundo tomak katak depois de periodu elisaun sempre iha vencedor I & II ou derrota. Relasiona ho ida ne’e ba Timor Leste presiza aliansa ka halo koligasaun entre partidu politikus ne’ebe hakat liu bareira hodi bele priense nu’udar forsa maioria iha parlamentu nasional no forma governu ho maioria.

Tuir realidade Timor Leste nia Politiku sira, hatene mak defende sira nia interese partidu, grupu no poder hodi selok malu iha arena politika ho nia rivalidade sira. Karik partidu politku sira haluha tiha katak maske iha rivalidade politika maibe povu fo nia konfiansa politika liu husi rezultadu elisaun atu fo poder ba politiku sira atu servi, laos hodi ukun deit. Tamba nee mak diferensia entre rivalidade ne’e vale deit wainhira halo kampaña elitoral, depois de ida ne’e, politiku sira iha kbiit no matenek atu resolve diferensia hanesan Sulastomo hateten iha nia livru Membangun Demokrasi Mengelola Globalisasi, iha ne’ebe nia sublinha katak Esensia baziku husi Demokrasia mak tenki rekuñese hasoru diferensia sira, nune’e mos iha solusaun atu resolve diferensia refere.

Alende isu, Sulastomu nia pensamentu refere lolos politiku sira aprende ida ne’e, mai ho pensamentu ida katak partidu politiku nu’udar instrumentu politiku ida nomós atu hadau poder ho nia rivalidade sira iha epoka elisaun. Intensaun atu ba hola responsabilidade hanesan Litre hateten katak politika ne’e hanesan siensia ida ne’ebe atu governa no jere nasaun iha ambitu jere nasaun, politiku sira labele mai ho idealismu ida ho konsesus kadeira (membagi kursi) deit no haluha tiha konsesu ba programa dezenvolvimentu nian ne’ebe refleta ba PLP – CNRT ofisialmente halo ona divorsiu no PLP hahu kaben barlakiadu ho Fretilin hein katak sei kazamentu no sei lafahe malu tan.

Kesi malu hamutuk nee hodi bele hare povu nia moris liu husi akumulasaun poder sira ne’ebe sira hetan. Nune’e hala’o politika hanesan Harold Laswell haktuir katak politica é o estudo da formação do poder. Iha ne’ebe politika ne’ebe dezenpeña husi poder politiku sira ne’ebe halo politika ba interese povu enjeral nian hanesan F. M. Suseno

                “Hateten katak Pengertian politik segala kegiatan manusia yang berorientasi kepada masyarakat secara keseluruhan, atau yang berorientasi kepada negara. Sebuah keputusan disebut keputusan politik apabila diambil dengan memperhatikan kepentingan masyarakat sebagai keseluruhan. Suatu tindakan harus disebut politis apabila menyangkut masyarakat sebagai keseluruhan”.

 Esperiensia Estadu krokodilu (Timor-Leste) hatudu kuaze tinan tolu ona hahu husi 2017 – 2020 politiku nain sira ne’ebe involve direita no halo desizaun sira iha partidu politiku sira halo hela pasagem bola alias pasagen interese poder entre sira nia rivalidade. No situasaun lori to’o mai iha momentu ida ne’e iha pandemia surtu COVID – 19 halo invade ba mundo tomak inklui Timor – Leste. Liu-liu iha ambitu krusial ida ne’e, lolos politiku sira atu tau ses nia rivalidade politika hodi foku ka kosentra ba Funu invizivel ne’ebe halo hela assasinado no ameasa ba humanidade iha planeta ida ne’e. Mais pior, povu infrenta hela hamlaha, tauk no trauma, politiku sira kontinua halo liku liku ho lei, estuda, analiza ignora tiha povu nia lian ne’ebe hateten diak liu mate tanba virus Corona (COVID-19) duke mate tan hamlaha.

Hanesan ema hotu hatene ser humanu (povu proleteriadu laos povu kapitalista) konsente katak moris diak nu’udar objetivu prinsipal ida maibe moris diak liu tan iha estadu no nasaun ida nia laran persiza poder politiku, karik hanesan Thomas Hobbes hateten katak material ida ne’ebe atu lori objetivu Umanu nian mak Poder/Kekuasaan, maibe pelu kontrariu ho Timor Leste nia situasaun atual. Mesmu nune’e, iha konstelasaun politika laiha inimigu para sempre no laiha amigu para so iha deit mak interese, karik ida ne’e mak partidu poltikus sira iha Timor – Leste hahu halo golpe ba nia aliadu, hahu reinstalasaun ba sira nia adversariu ne’ebe antes ne’e nu’udar rivalidade ida ne’ebe mais defensivu iha epóka kampaña elitoral.

Maibe iha parte seluk, kestaun ne’ebe hakerek na’in koloka mak povu kontinua sai vitima. Tanbasa mak dezenvolvimentu kontinua hakdasak no grupu balun aproveita rikeza nasaun nian ba bebeik, libertasaun do povu hela ho slogan?

Hau presume katak, perguntas ne’ebe mensiona iha leten nee mosu tanba politiku sira sente feliz ho salariu ne’ebe adekuadu, seguransa no privelejiu sira seluk, povu kontinua hela situasaun ne’ebe mizeria nia laran tinan ba tinan amen. Kestaun ida ne’e lolos hanesan lider no politiku falla tamba lalori benifiisu ba organizasaun hanesan estadu no nasaun, la atinji objetivu ba povu nia moris diak iha ambitu kalamidade publiku no situasaun normal.

Iha pate ida,  hakerek nain hakarak atu konklui katak rivalidade entre futebolista iha mundu, sira iha vencedor ne’ebe absoluta no fo satisfasaun ba adeptus, maibe politiku sira iha kestaun rivalidade sira iha deit mak inserteza no insatisfasaun ba militante simpatizantes no povu enjerál, mais pior halo sofre liu tan. Tanba nee, hakerek nain atu salienta tan katak sai politiku labele sente ondra ka previleju ida ho pensamentu fasista, hodi esplora no esploita klase baixa, liu husi poder politiku no militar.

Iha parte seluk hakerek na’in hakarak kontribui hanoin konstruktivu balun ba politiku sira ne’ebe halo politika ba estadu no nasaun ida ne’e, diak liu halo tuir pensamentu Aristoteles ne’ebe afirma katak politika ne’e esforsu sosiedade hotu nian iha nasaun ida ho objetivu atu hetan valor ne’ebe diak ba interese komun.

Ikus liu, ba politiku sira presija servi Estadu Republika Demokratika de Timor – Leste (RDTL) ho prespetiva Direitu Umanus hodi nune’e melhora nafatin estadu nia objetivu ba nia sidadaun sira nia direitu hodi promove, proteje no hakonu liu liu estadu nia obrigasaun positivu (ekonomia, kultura no sosial) no labele interven demaziadu ba estadu nia obrigasaun negativu (Sivil & Politiku).

Iha artigu ida ne’e, hakerek na’in la repezenta instituisaun sira ne’ebe involve no halo kna’ar an ba. maibé ida ne’e nu’udar sidadaun ne’ebe expresa hanoin bazeia ba KRDTL nomós hakerek na’in agredese ba sujestaun no kritika husi sira maluk leitors sira.

Artigu nee mos publika ona iha STL no Timor Post iha dia 12 de Maio 2020

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: