Sera que ita presija kestiona ajudu externa husi China?

Eixo da asistensia humanitaria versus eixo da divida1-27

China nudar pais ida ne’ebe ho status rendimentu media alta (upper-middle-income country), no konsidera hanesan segundo mais kresimentu ekonomia depois Estadu Unidos da Amerika. Alende alkansa ho maioria kresimentu ekonomia bo’ot iha rejiaun Asia, China mos tama ona iha kategoria  maior doador alende de pais dezenvolvidu sira iha membru (Organização para Cooperação e Desenvolvimento Econômico-OCDE). Realidade hatudu ona katak pais ki’ik no sub dezenvolvidu  barak mak hetan ajudu husi  governu Cinez.

Kuaje iha tinan rua nia laran, durante sutru COVID-19, asistensia humanitarian nudar meius ajudus externa governu Cinez iha plataforma politika externa nasaun China. Nasaun ho populasaun boot (1.3 biliaun) nee fornese ona tipu asistensia oi-oin ba nasaun sub-dezenvolvidu sira iha mundu. Ezemplu hanesan Timor-Leste iha fulan 23 de Fevereiru 2020 simu ona ekipamentu mediku baziku balun no kontinua iha 24 de Marsu, simu 300 ventilador, maskara no ekipamentu baziku sira seluk ne’ebe uza ba nesesidade saude nian.

Alende ajudu humanitarian, ajudu externa husi governu Cinez laos buat foun ba Timor-Leste. Asistensia ajudu apoiu politika mos hahu kedas antes Timor-Leste ukun-an iha 2002, no apoi hirak ne’e kontinua iha pos-da independensia. Ezemplu iha tinan hirak kotuk liu ba governu Cinez harii ona ho gratuita edefisiu balun hanesan : Palásio Presidensial Timor-Leste, o gabinete da residência  F-FDTL, Centro de Estudos Diplomáticos, no Quartel do Exércisito no Abitasaun nomos edefisiu Ministro dos Negócios Estrangeiros e Cooperação Timor-Leste (MNEC).

Governu Timor-Leste mos asesu ona fundus emprestimu husi China iha 2015 liu husi banku Exim. Fundus ne’e simu liu husi akordu bilateral ho osan montante $ 50 milhões, ho taxa funan annual 2% (interest rate per annum)  durante tinan 20 nia laran ho períodu de carência  ho tinan 5. Osan ida nee uza hodi hadia sistema drenajen iha Timor-Leste.

Mesmu asistensia gratuita no osan imprestismu ne’ebe ita hetan ona,  iha tan proposta atu harii edefisiu no residensia parlementu nasional Timor-Leste ho osan Cinez nian. Relasiona ho suntu harii uma residensia parlementu mosu reasaun balun husi media sosial, debate no kritikas oi-oin. Maioria sira ne’ebe la konkorda ho idea konstrusaun foun ne’e kestiona katak tanbasa mak parlementu hakarak hela iha edifisiu no uma luxu. Kestaun ida nee interesante, (karik ita bele kolia ho klean iha sesaun seluk), maibe importante liu iha artigu ida nee, kestiona ho perguntas tanbasa mak elit politiku sira, representate povu iha uma fukun nasional hakrak husu ajudus atu harii edifisiu luxu ba governu Cinez?

Husi deklarasaun presidente parlementu nasional hatudu momos katak parlementu sei ba buka fundus husi liur ho maneira (outsourcing). Karik fundus nee gratuita ou nudar imprestimu, ou husu ajudus husi trabalador tekniku husi nasaun China atu hari edefisiu luxu nee, klaru ona katak ita nia elit politiku iha parlementu nasional hakarak uza aproximasaun husi tulun (ismola) ba nasaun China.

Too agora, informasaun ne’ebe ita akompana iha media nasional seidauk iha sinal visivel ou loos katak governu Cinez sei simu proposta ida nee, fo ajudus gratuita mai ita atu harii konstrusaun edifisiu luxu nee ho montante osan boot. Karik governu Cinez sei simu proposta nee ho kondisaun “imprestimu” ho karakter “soft loan”, Imprestimu Suave ou flexivel ho selu neneik ho funan ki’ik.

Apezar husi generosidade governu Cinez ba Timor-Leste sobre asistensia ekonomiku ne’ebe ita hetan depois ukun-an kuaje tinan 18 nia laran, presija ita haree mos esperensia husi nasaun seluk. Ezemplu esperensia husi nasaun Srilanka ne’ebe karik interesante ba ita atu hatene. Governu Srilanka intrega sira nia portu ba China tanba selu funan husi imprestimu husi China no labele selu tuir akordu ne’ebe sira halo, no nia konsikuensia mak tenke entrega aset (riku soin balun) a governu Cinez.

Diplomasia da ekonomia politika hanesan nee pode ser akontese mos iha nasaun no rejiaun sira seluk. Ho rajaun hirak ne’e, akademista, peritus no aktivista balun kontinua alerta ba mundu tomak katak prezensa ajuda fundus ekonomia Cinez ho (Chinese Aid) hamosu fenomena. Ho akontesimentu fonomena ida nee hamosu kritika ho xamada boot ba modelu ekonomia Chinez ne’ebe hanaran “Diplomasia Lasu ho Debitu” (debt-trab diplomacy). Termu ida nee liga ho asuntu atividade ekonomia politika ho ajenda “naksubar”, fo debe maibe kria eixu dividas ba estadu nebe debe, ou hanesan lasu ho kee raikuak ba ita liu husi deve. Too ikus deve sira nee ita labele selu entaun aset, rikusoin estadu nian tenke fo ba sira.

Nasaun boot sira ne’ebe sai hanesan ajente kreditor (fo impresta osan) sira iha ajenda estratejia ne’ebe ho intensaun kuandu osan sira ne’ebe nasaun imprestador (recipient) sira la selu, konsikuensia mak tenke sita asset balun ou prioriedade nasaun ninian.

Situasaun hirak ne’ebe mak ilustra ona iha artigu nee nudar lisaun boot ba povu Timor-Leste. Husi ne’e ita bele komprende katak mesmu nasaun sira ne’ebe ita konsidera sira nia ajudus nudar abordajen  humanismu, maibe ita presija sempre ho prudemente neon nain ba asuntu hirak nee. Ezemplu boa vontade husi governu Cinez ita presija apresia no respeita. Ajudus balun ne’ebe sira fo’o ho laran, nudar motive asistensia humanitarian, hanesan ajudus ba surto COVID-19 ho ekipamentu balun ne’ebe ita simu ona, no ajudu seluk ne’ebe ita simu molok ukun-an.

Maibe importante liu mak situasaun ida ne’ebe akontese ona husi nasaun seluk sai lisaun boot mai ita hotu. Molok atu deside decisaun politika ruma, politiku nain sira tenke ho prudente, koidadu, hases interese politika no tau interese komun. Presija halo konsultasaun ho povu, akademista no rona opiniaun publiku ba kualker decisaun sira ne’ebe mak iha risku atu nune’e decisaun sira nee bele mosu tuir dalan loos. Ezemplu atual mak agora dadaun ita nia leit politiku sira iha parlementu kuandu atu deside hodi harii uma luxu liu husi ajudu finanseiru husi governu Cinez, ida nee presija haree didiak. Memsu ita hare katak governu Cinez iha intensaun diak maibe too ikus mai hamosu fenomena eonomia politika ho dalan eixo (axis) ajuda humanitarian nakfila-an sai eixo dividas (destruisaun futuru jerasaun foun Timor-Leste ho debe).

Celso da Fonseca, 29/8/2020

 

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: