Dikotomia Politika Pandemia no Virus anti-Demokrasia.

Politika kombate pandemia virus hamosu ajenda dikotomia politika. Elit poliku sira aproveita situasaun pandemia ho rajaun kombate virus Korona, maibe iha tenpu hanesan kontrola advesariu politiku inklui kritika demokratiku husi cidadaun sira. Iha kalae, indikasaun politika aproveita situasaun estadu da emerjensia hodi hasae forsa politika status quo no fo risku ba prisipiu estadu de demokratiku? <<<< Le’e opiniaun badak tuir mai nee>>

Celso da Fonseca

Intervensaun politika atu kombate pandemia COVID-19 sai debate akademia no politika. Ezemplu, estudu balun hatudu katak lider politiku sira husi Sudeste Aziatiku uza situasaun ne’e hodi kontrola movimentu sidadaun no kontrola adversariu poilitiku, inklui ativista sira. Iha parte seluk, iha idea balun apoiu politika ho maneira autoritarian kosidera nudar modelu ne’ebe susesu hodi elimina virus nee. Maibe, situasaun ida ne’e fo risku ba demokrasia no direitus umanus. Thomson no Ip (2020) argumenta katak politika nain sira ukun sira nia nasaun ho modelu autoritário; de faktu, hahalok ne’e fo ameasa ba direitu politika no civil. Aleinde ne’e, governante barak iha mundu responde krize saude ho aproximasaun politika oin rua iha tenpu agora. Mesmu governu ho susesu elimina moras pandemia ida ne’e, maibe situas ne’e nakfila-an ba ukun ho ditadura.

Mesmu nasaun autoritarian balun, espesialmente iha Sudeste Aziatiku konsege reduz surtu COVID-19 ho diak, maibe ida nee laos model diak nudar lisaun ba nasaun sira seluk. Meagher (2020), iha nia artigu, ilustra katak nasaun hanesan Kambodia konsidera nudar país ho ezemplu diak kombate espalamentu virus tanba sira nia adopta medida saude ho diak. To’o agora seidauk iha estudu apropriadu ne’ebe fo evidensia katak politika ho maneira autoritarian kontibui hodi konkista intervensaun kontrola pademia virus. Karik susesu hanesan nee bele sai ezemplu ida ne’ebe inspira nasaun barak iha kontinente Asia hodi adopta sistema hanesan ne’e, nune’e mos argumento falacioso (fallacy argument) sai istrumentu politika hodi asegura medidas saude nian ba nasaun sira iha parte norte nian. Lojika argumentu hirak ne’e rasionaliza ona politiku nain sira hodi koninua sira nia jestaun liderança antidemokrátiku para mantein politika status quo.

Fenômeno ida ne’e revela debate foun. Iha situsaun hanesan ne’e, sei nesesariu ka lae atu tau hase’es prinsipiu demokrasia no direitus umanus kuandu nasaun ida enfrenta situasaun krize saude iha momentu situasaun surtu COVID-19?

Matenek nain barak argumenta katak medida da emerjensia saude nian tenke bazeia ba prinsipiu demoratiku no respeira direitus umanus fundamental sira. Hanesan nasaun barak mak adopta ona protokolu saude  husi organizasaun Saude Mundial (WHO) hodi kombate virus risku ida nee. Klaru tebes katak ideas hirak nee akumula husi lider politiku mundial liu husi padraun saude mundial nomos denfensor direitus umanus, no pro demokratiku sira rekomenda hodi uza prinsipiu fundamental direitus umanus no demokrasia iha situasaun kualker krize umanu, liu-liu iha tenpu agora.

Artigu ida nee foti kazu Timor-Leste, especialmente iha momentu estadu da emerjensia no krize saude nian ba ameasa seguransa povu Timorense. Artigu ne’e deskreve oituan kona-ba oinsa governu Timor-Leste prevene pandemia virus ho jestaun medida politika proporsionadu. Wanhira governu fo sai kazu permeira virus Corona iha fulan Marsu, 2020, husi tenpu ne’eba ema hotu komesa tauk no paniku. Responde ba situasaun ida ne’e, populasaun maioria rekomenda atu taka aeroportu no fronteira terestre. Aléide ne’e, sira mos hakarak atu governu bele uza intervensaun rigorozu no karik bele uza abordajen autoritária, ida ne’e mais razoavel atu salva vida cidadaun hotu-hotu.

Enkuantu pais ida nee enfrenta krize saude, iha tenpu hanesan, governu enfrenta krize politika. Incerteza politika kona-ba se’e mak bele ukun no oinsa atu ukun tuir dalan padraun legal no konstusional sai debate publiku. Kona-ba asuntu ida ne’e, iha parlementu nasional, partidu politiku balun ho forsa aliadu obriga meja parlementu ne’ebe ukun husi partidu no formatura governu konstitusional da-VIII. Situasaun ida ne’e provoka kritika no intensu protesta publiku hasoru governu no parlementu ne’ebe konsidera “hadau ukun” liu husi maneira naun-demokratiku.

Aleinde protesta publiku, diskursu principal mosu ho kestaun katak direitus umanus no demokrasia sei sai nafatin episentru politika no ra’an-moris iha estadu demokratika, mesmu iha situasaun krize saude nian. Karik tanba deit ho situasaun ida ne’e governu iha direitu atu kontrola movimentu sidadaun nian inklui direitu expresaun hanoin.

Ba direitu politika no civil durante iha situasaun estadu emerjensia, iha artigu 25, konstitusaun Republika Demokratika de Timor-Leste (RDTL) hakerek ho klaru katak suspensaun hodi excerse direitu fundamental, liberdade sira sei akontese iha situasaun estadu emerjensia, maibe uniku lei deit maka regula no limita direitu hirak nee. Konstitusaun hatu’ur enkuadramentu legal ba governu atu kria lei ki’ik ida ne’ebe regula liberdade no direitu fundamental sidadaun sira liu husi dekretu lei. Situasaun krize saude nia hamosu dekretu lei governu nia ne’ebe hahu’u husi fulan Marsu no extende ate fulan ida ne’e (Outubru, 2020). Lei hirak ne’e produz bazeia ba protokolu saude mundial nian nomo’os bazeia ba konstitusaun RDTL. Ida ne’e hatudu katak, dieitus fundamental sira inklui politika governu tenke halo tuir padraun sira ne’ebe la kontra prinsipiu boa governasaun, liberdade cidadaun no direitu politika no civil iha padraun dieitus umanus no demokrasia.

Mesmu iha konstitusaun no protokolu saude mundial realsa medida prevensaun saude ne’ebe tuir ekuadramentu legal sira, maibe iha durante tenpu situasaun estadu emerjensia, mosu restrisaun liberdade expresaun hanoin, iha kontrola no ameasa ho forsa husi parte seguransa no aktu bandu liberdade atu hato’o opiniaun.

Ukun ho modelu autoritaria mosu iha situasaun pandemia hanesan: politika defamasaun kriminiliza liberdade da expresaun ne’ebe sai hanesan diabo demokrasia (Fonseca, 2020); kontrola manifestasaun estudante nomos bandu grupu movimentu adversariu politika sira. Situasaun hirak ne’e sai ezemplu hodi esklarese aktu governu ba asaun naun-demokratiku. Iha artigu ida ne’e, ezemplu vizivel ida mak hanesan wainhira grupu (Movimentu defende Konstitusaun RDTL) koko hodi halo asaun manifestasaun hasoru presidente da republika no governu inklui parlementu, iha duni amesa represivu mai husi institusaun militar. Tuir informasaun ne’ebe mosu iha media sosial no eletroniku, wanhira grupu hirak nee hakarak atu halo manifestasaun, sira hetan amesa. Tuir media Tempo Timor (2020) relata katak, rezidensia kordenador da grupu manifestante hetan kontrolu maka’as husi parte seguransa nasional, forsa defeza Timor-Leste. Komesa husi momentu ne’e, atividade manifestasaun la kontinua tanba sira sente la seguru no ameasadu.

Restrisaun ba manifestante sira hatudu ho klaru ona katak motivasaun politika hatauk nia sidadaun husi ukun-nain sira fo risku boot ba demokrasia no direitu cidadaun sira nia iha vida politika no civil. Kondisaun restrisaun movimentu sidadaun sira nee harudu katak, politiku nain sira aproveita situasaun estadu da emerjensia hodi hasae forsa politika status quo. Nune’e mos situasaun nee hatuduk katak governo Timor-Leste iha ajenda dikotomia politika hodi uja situasaun pandemia ho rajaun kombate virus Korona, maibe iha tenpu hanesan kontrola advesariu politiku inklui kritika demokratiku husi cidadaun sira. Situasaun ida ne’e revela kapitulu politika COVID-19 foun hanesan mos nasaun sira seluk iha sudeste Aziatiku, liu-liu nasaun sira ne’ebe ho maneira nau-demokratika. Politika ida ne’e hatudu ba povu Timor-Leste ho esperensia moruk iha ambiente epicentria demokrasia iha vida nasaun RDTL.

Governu presija re-ezamina nia papel nudar portador de dever hodi servi nia cidadaun sira, mesmu iha situasaun kulker krize hanesan iha tenpu pandemia virus Corona, mantein prinspiu estadu de direitu demokratiku duke halo politika hodi fo benefisiu ba sira nia interese grupu no partidu politiku sira, no too ikus sakrifika demokrasia no direitus umanus iha nasaun ki’ik ida nee.

Referencia

Fonseca, Celso (2020): Hantu demokrasi di Timor-Leste, hanya satu kata “lawan”<Disponivel iha> https://webcelso.net/2020/07/03/hantu-demokrasi-di-timor-leste-hanya-satu-kata-lawan/

Government of Timor-Leste, Offical Website (2020) “DECRETO DO GOVERNO N.º 10/2020      De 6 de Agosto” <Disponivel iha >: http://timor-leste.gov.tl/wp-        &nbsp; content/uploads/2020/08/DG-Medidas-de-execucao-DPR-55_20206.pdf

Meagher, Dominican (2020) “ What’s the secret to Southeast Asia’s Covid success stories?” Lawy Institute, 28 Jul 2020 < Disponivel iha >: https://www.lowyinstitute.org/the- &nbsp; interpreter/what-s-secret-   southeast-asia-covid-success-stories

Timor-Leste Constitution (2002)” Constitution of Republic Democratic of Timor-Leste” < Disponivel iha >: http://timor-leste.gov.tl/wp-content/uploads/2010/03/Constitution_RDTL_ENG.pdf

Tenpo Timor (2020) “RNDJK Planu Hatun Xefe Estadu, Lere Sei Futu Ángela no Aitahan Matak”  < Disponivel iha > https://www.tempotimor.com/seguransa-defesa/3347-planu-hatun-      &nbsp; xefe-estadu-lere-futu-angela-no-aitahan-matak <accessed: 3/10/2020>

Thomson, S. and Ip, E. C. (2020) ‘COVID-19 Emergency Measures Are Hurting Democracy          Globally’, American journal of public health, 110(9), pp. 1356–1357. doi: 10.2105/AJPH.2020.305816

 

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: