Tamba sá Dezenvolvimentu Agrikultura La’o hanesan Lenuk?

Autor: Leovogildo Belarmino (Kaisala Ara)

Foto husi: Agora Food Studio

Planu estratéjia, kualidade jestaun no programa ne’ebe la klaru sai hun ba problema dezenvolvimentu agrikultura. Nune’e mos jestaun parseria ba utilizasaun rekurusu sira seluk sei konsidera fraku tebes. Fenomena sira ne’e sai impaktu husi polítika governu ne’ebé estagnada no halo dezenvolvimentu agrikultura lao hanesan Lenuk.

Iha diskursu públiku kona-ba Timor-Leste nia polítika agrikultura ne’ebé seidauk define klaru atu orienta ba nebe? Karik polítika seguransa alimentar ka atinji vizaun revolusaun verde ne’ebé hatu’ur ona iha Planu Estratéjia Dezenvolvimentu Nasionál?

Desde 2001 to’o ohin loron ita infrenta nafatin problema alimentar hanesan: malnutrisaun, hamlaha, insufisiénsia aihan, dependénsia aihan husi rai liur. Atu responde preokupasaun sira ne’e, instituisaun hanesan Ministeriu Agrikultura no Floresta-MAF taka-an demais no la responde problema sira ne’ebé ita nia povo liu-liu toos nain sira infrenta. Tanba laiha solusaun pragmátiku no sustentável hodi hatan nesesidade to’os nain sira. Ho serteza ida nee, ita tenke husu tamba sa mak programa agrikultura lao hanesan lenuk?

Bainhira hata’an ba asuntu refere, hamosu opiniaun públiku kona-ba laiha investimentu naton ba iha seitór refere. Nune’e mos, públiku kestiona katak kapasidade limitadu atu kobre area hotu. Maibé, ida ne’e la’os razaun fundamental tamba to’o ohin MAF seidauk iha polítika agrikultura ne’ebé klaru, orientasaun ba cash crop no merkadu la’os meus atu hatan problema malnutrisaun no hamlaha iha rai laran.

Iha parte ida, bainhira governante ida nia mandatu remata no troka ho seluk, nafatin la hatudu mudansa signifikante. Tanba ida ne’e, ita tenke buka tuir problema nia fukun. Maior parte ita bele dehan problema nia hun mak polítika agrikultura ne’ebé la klaru no jestaun sira ne’ebé kestionével. Ezemplu, planu estratéjia, kualidade jestaun no programa. Nune’e mos jestaun parseria ba utilizasaun rekurusu sira seluk sei konsidera fraku tebes. Fenomena sira ne’e sai impaktu husi polítika governu ne’ebé estagnada.

Iha parte seluk, planu sira nee presija hatu’ur lolos iha nia fatin. Ida ne’e fila ba ukun nain sira iha MAF. Ita lalika ‘terbawa’ ho laloran polítika agrikultura global nian ne’ebé no fim habokur kompania ka koorporasaun internasionál sira. Tanba Durante ne’e polítika agrikultura adopta sistema globál ne’ebé influénsia husi organizasaun internasionál sira iha Timor-Leste. Ita tenke iha polítika rasik ne’ebé kondusivu, bazeia ba nesesidade real povo tomak nian no utiliza fali rekursu lokál ne’ebé eziste.

Governu presiza aplika polítika soberania aihan iha asaun sériu, ida ne’e nudar asaun euqivalnete husi planu estratéjia ne’ebé fo dalan ba autosufisiénsia aihan, hanesan hadia polítika nutrisaun rai laran, promove aihan organiku sira ne’ebé típiku ba Timor-oan sira husi tempu ba tempu eziste ona, eleva investimentu ba iha diversidade aihan nomós hadia ekonómia familia.

Atu atinji polítika agrikultura sustentável, programa agrikultura tenke implika ba asaun sira olístiku no integradu duke halo polítika segregasaun. Ho solusaun simples ida ne’e, ita bele ultrapasa dependénsia aihan no asegura aihan organiku hodi alkansa ba dezenvolvimentu sustentável iha area agrikultura.

Asuntu hirak ne’ebé mensiona iha leten, bele sai alternativa hodi uza rekursu sira ne’ebé eziste ho masimu. Liu husi utilizasaun poténsia agrikultura ne’ebé ita iha, hanesan rai produtivu sira iha area rural no urbana ne’ebé la utiliza ho efetivu, bele maximiza hodi halo kultivasaun aihoris oi-oin ho maneira, to’os uma hun, to’os eskola no to’os komunidade tuir prinsípiu permakultura ka modelu agroekolójiku.

Ikus liu, polítika ba autosufisiénsia aihan iha kada uma kain no ninia surplus sira bele utiliza hodi sai sai rekursu hodi garante sustentabilidade aihan ba kada familia iha Timor-Leste. Nune’e mos produtu hirak ne’e bele fo vantajen ekonómiku ba agrikultór sira, tanba bele fa’an iha merkadu komunitária. Nune’e mos bele utiliza hodi ajuda ba sira ne’ebé menus aihan.

Mehi sustentabilidade bele kria liuhusi maneira bairo sustentável iha sidade laran tamba bele mos kria servisu ba joven sira hodi sai autór ho produsaun aihan. Nune’e bele hamenus despeza familia nian ba sosa aihan sira iha merkadu, promove kulinária lokál iha bairo sira hodi atrai turismu lokal, promove ita nia kultura nomós promove balansu ambientál no eleva dezenvolvimentu iha saude públiku liuhusi nutrisaun. *KA*

Editadu husi: Webcelso team.

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: