Re-ativa Esperensia Moruk ho LOCKDOWN, Retorika Politika no Planu Vasinasaun

Dalandiak atu HAKMA iha uma, tidin laptop no hamaluk ho kafe no muzika. Enjoy no labele stress ka paniku.

Estadu emerjénsia ba dala XI ne’ebe hahuu husi 04 Marsu 2021 no remata 02 Abril 2021, nudar orden lno regulamentu governu ita hotu tenke kumpri. Regulamentu ida nee halo publiku shock oituan tanba laos tanba limita ita nia atividade, maibe iha ona transmisaun lokal. Transmisaun nee komesa hahu husi  Munispiu 2 rua (Suai no Bobonaro), agora hada’et ba munispiu sira seluk. Ho situasaun tauk, paniku, agora ema hotu-hotu tenke hela iha, hakmatek iha ida-idak nia residensia.

Situasaun ida nee mos lori ita fila fali ba imajinasaun dejavu ne’ebe liu ona iha fulan 11 liu ba, iha Marsu 2020.Iha momentu ne’eba, wanhira Timor-Leste aplika estadu emerjensia ho maneira lockdown, hamosu debate publiku no intervensaun husi frontliner no ajente estadu sira (seguransa) baun ho asaun agresivu ba cidadaun sira, trata malu, uja linguajen ofendidu no diskriminativu mai husi maluk Timor-oan rasik iha rai laran.

Iha dualismu argumentu, balun pro no kontra kona-ba intervensaun husi estadu ne’ebe ladun respeitu no dignifika direitu fundamental cidadaun nian. Ezemplu, wanhira PDHJ tuun hodi halo fiskalizasaun, monitoring, nitizen sira halo reasaun negativu institiusaun hirak ne’ebe halo intervensaun hodi defende diretu cidadaun sira husi abuzu de poder.

Alende mosu situasaun konradikotriu husi cidadaun sira kona-ba mekanismu kontrola movimentu cidadaun sira. Mosu mos produtu politiku lei balun ne’ebe kontradizm hanesan limitasaun, restrisaun halo manifestasaun, mosu lei “kriminlaiza defamasaun” no seluktan.  Pior liutan, membru Duty Bearer (Portador de dever)sira husi governu no iha uma fukun nasional, dala ruma hasai liafuan mal-edukadu nia hasoru nia cidadaun, ezemplu hatete semak “hakaat fronteira” Tiru mate deit ka baku tohar. Nune’e mos mosu linguajen diskriminativu seluk “China Pirata”, kontra intervensaun igreja, “hasai batina” hodi halo polituku. Buat barak mak ita enfrente iha kuaje besik tinan ida nia laran.

Situasaun moruk ne’e fo lisaun ida mai ita, ohin ita nonok maibe mos halo ita re-lembra fila fali fenomena hirak ne’ebe akontese ona iha tinan kotuk. Espera ita hotu kalma, hein governu ida nee komesa nakloke ona sira nia matan, sa politika saida mak sira halo salva ita hotu nia vida. Karik ita hein atu fulan oin mai komesa halo vaksinasaun, ka kontinua halo lockdown (Konfinamentu) teritoria tomak.

Buat ida ne’ebe interesante ba hau, tuir hau nia observasaun durante nee. Intervensaun governu atu hakalma situsaun, karik hanesan iha tinan kotuk iha entre fulan Marsu no Abril 2020, sira hahu ho retorika politika. Konvense cidadaun hotu-hotu liu husi atividade Ritual, Anti COVID-19. Konvida komunidade tomak, lian nain sira atu hamrik halo ritual, husu matebian sira, rai-nain tomak para proteje ita, no iha manu ho fahi nia aten hatete katak moras ‘at nee sei la mosu iha Timor no balun dehan Timor-oan sei la mate husi moras nee.

Situasaun nee hautudu ba publiku, povu tomak katak para iha parte ida hatudu momos katak virus COVID-19 eziste duni, no presija ema hotu presija tau atensaun, nonok no kalma iha ida-idak niafatin. Too ikus ema hotu, tenke simu situasaun ida nee iha Timor-Leste, no simu decijaun  estadu emerjensia. Ohin, retorika ho intensaun postivu ne’e mos karik kontinua hamoris fali, adopta fila fali ho estratejia hanesan, karik ida nee bele loos ka sala, depende ida-idak fo argumentu.

Husi hau nia hare’e, politika hodi konvense cidadaun sira komesa hahuu ona ho retorika foun. (hau la’os atu ho internsaun hatete katak transmisaun lokal ne’e produtu politika inventadu) maibe hau argumenta ho maneira ne’ebe governu uja nee ho intensaun positivu balun atu konvense simu politika intervensaun foun. Kaundu ita observa didiak ho argumentu real, katak transmisaun ne’e importadu husi nasaun vizinu. No karik ida nee akontense desde iha fulan Marsu 2020, ema tama-sai hela deit husi Atambua mai Timor-Leste, iha tinan ida nia laran transmisaun lokal akontense ona no nia numeru bele boot ona.

Ema matenek nain sira iha governu hatene momos, sira iha kapabilidade diak hodi halo kalkulasaun diak inklui estratejia diak atu prevene. Realidade too agora ita nia rai sai ezemplu diak iha mundu ba prevensaun COVID-19, laiha kazu ema mate husi COVID too agora, iha tenpu artigu nee hakerek. Maibe tanbasa mak foin situasaun ida nee foin mak deskobre katak kauza husi transmisaun lokal nee husi ema sira ne’ebe tama mai Timor-Leste ho ilegal husi fronteira. Problema ida nee uluk kedas, iha kritika no opiniaun barak-barak husi sidadaun sira, maioria sira konkorda katak dalan diak atu kontrola espalhamentu moras pademia COVID-19 tenke taka total ka kontrola masimu fronteira terestre sira.

Realidade foin mosu, loke ita matan katak hu’un husi transmisaun COVID-19 hahu husi Suai mai Bobonaro, tuun mai Baucau, fila Fali ba kapital Dili, tuun fali ba Lautem no iha Viqueque no la kleur-tan transmisaun lokal iha teritoriu tomak sei akontense.

Wainhira iha situasaun paniku, tauk no mosu rumor oi-oin, dalan lojika liu mak ita tenke simu planu governu ne’ebe sei halo vasinasaun masiva ne’ebe agora governu prepara dadaun no sei implementa iha fulan Abril 2020. No molok halo implementasaun, ita hotu tenke halo teste, depois ida nee, vasinasaun sei implementa tuir kada etapa tuir planu governu nian.

Hau haree ida nee dalan diak ida atu hamate pensamentu skeptismu ba  sira ne’ebe sei hanoin barak atu simu vasinasaun. Hau nota husi media sosial, nomos wanhira kolia ho maluk Timor-oan balun, sira hatete katak “ami sei simu vasina wanhira membru governu sira vasina uluk sira nian-an”. Balun mos dehan sira sei hein tinan id aka rua nia laran, kuandu hare vasina nee efetivu mak foin bele simu vasina nee.

Protesaun ho imunidade sintetiku ida nee diak, garantia ita nia vida, no ba oin Timor-Leste sei moris HAKMA, atividade ekonomiku, sosial no politiku lao normal. Governu ida nee mos hakmatek halao nia funsaun ho normal. Maibe molok atu halo retorika postivu ida nee’ iha tenpu badak nee mos presija halo sosializasaun, esplikasaun vasina nee para ema hotu tenke hatene, asesu informasaun ho klaru.

Hau pesoal, diak liu hakmatek, iha loron hirak nee nia laran, hamaluk-an ho hau nia Laptop, monta meja kiik ida iha liur, iha hau nia knua-kiik ne’ebe bain-bain hau gasta tenpu barak liu hodi le’e ka hakerek buat balun, no la haluha ho kafe iha sorin ni muzika.

Loron diak ba ita hotu, enjoy imi nia loron, no tenke hanoin positive no labele paniku ka stress.

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

<span>%d</span> bloggers like this: