Polemika dansa kultura “Biti” iha Dubai Expo

Iha semana ida-ne’e, mosu debate públiku kona-ba dansa kulturál ho konseitu “BITI” ne’ebé grupu delegasaun husi Timor-Leste, hamutuk ho grupu dansa kultural aprezenta iha eventu internasional, iha (Dubai Expo). Mesmu tuir politiku nain sira ne’ebe partisipa iha eventu ne’e fiar-an, kontente tanba pelumenus ba hatudu-an ho identidade Timor-oan sira nian iha Dubai, maibe iha parte seluk partisipasaun delegasaun sira iha eventu ne’e hetan kritika maka’as husi sosiedade civil no cidadaunTimor-oan sira ho pergunta simples, tanba sa mak utiliza konseitu “biti” iha performansia dansa kultural?

Foto, foti husi media sosial

Argumentu importante rua sai hanesan pro no kontra ne’ebé habelar iha média sosiál no notísia Nasionál durante semana ne’e. Iha parte ida, Governu Timor-Leste, liu husi MCAE no ekipa delegasaun hato’o argumentu katak Expo Dubai ne’e importante ba Timor-Leste atu promove potensialidade produtu lokal Timor nian nomoos introdús setór turizmu Timor-oan nian. Iha expo ne’e mós aprezenta produtu lokal oi-oin no dansa kulturál ne’ebé sai hanesan identidade Timor-Leste nian. Tuir Ministru Kordenador Asuntu Ekonomia (Sr. Joaoquim Amaral) hatete katak, konseitu “Biti Lokal” nee aprezentasaun kreativade lokal, tanba biti utiliza ba funsaun barak, representa atividade lokal no kultura Timor-Leste nia. Dansa kulturál sai hanesan dezempeñu identidade kulturál Timor-oan sira nian ne’ebé pelumenus liu husi atividade hirak ne’e ema iha rai liu ne’eba hatene ita-nia identidade liu husi produtu no plamfetu ka foto hirakne’ebe tau iha exebisaun ho fatin potensia turizmu lokal iha expo ne’e.

Expo ne’e involve ministeriu balun (Ministeriu Agrikultura, Turismu e Komersiu, MTCI, Transporte, Petroliu no Minarais no ministru Negosiu Estrajeiru), sira prezensa iha DubaiI karik iha intensaun di’ak atu koko promove potensialidade rekursu turizmu no produtu lokál iha nivel internasionál. Maibé, iha fukun ida ne’ebé sai debate iha públiku no hetan reasaun kritika maka’as husi sosiade civil, ate FONGTIL konsidera iha tendensia bakorupsaun no kolusaun, no hatoo ona keixa ba CAC. Alende ida ne’e publiku mos julga maka’as ho perpektiva negativa ba performansia dansa kultural ne’ebe utiliza biti.

Iha mos grupu artista balun husi organizasaun lokál hato’o argumentu krítiku, ne’ebé ha’u nota husi diskusaun iha TVE iha 20 Outubru 2021, foin dadaun ne’e sai kestaun sériu ba preparasaun no implementasaun eventu expo Dubai, liuliu kona-ba dansa kulturál nian. Dansa kulturál ne’ebé uza hanesan artezenatu tradisionál hanaran “dansa palku biti ” konsidera katak totalmente hanesan ho dansa kulturál husi rai seluk. Maneira hatais iha eventu dansa kulturál ne’e konsidera replika hatais husi filme Aladdin (Istoria ka dongen ne’ebe famozu iha médiu oriente). Utilizasaun instrumentu biti no modelu permorfansia arte nian hanesan lolos husi nasaun Vizinu Indonesia (husi provínsia Sumatra no grupu kulturál sira seluk iha Indonézia).

Aleinde polemika kona-ba perfomansia dansa biti, molok grupu selesionadu no delegasaun sira ba Expo Dubai, debate kontroversial ida mosu ona entre organizasaun dansa kulturál lokál sira. Grupu balu kritika tiha ona katak konseitu, no filosofia, script husi dezempeñu kulturál ne’ebe aprezenta iha Dubai totalmente la bazeia ba identidade kulturál Timor nian tanba la autentiku ona tuir prinsípiu no valór lokál. Tanba ne’e, grupu sira-ne’e rejeita atu la hola parte iha Expo Dubai.

Husi polémika ida ne’e, saida mak ita tenke aprende nu’udar lisaun foun husi problema sira-ne’e. Tuir lolos, asuntu ida ne’e iha ligasaun ba papél Sekretáriu Estadu kultura nia. Tenke iha abordajen komprehensiva ida-ne’ebé ko’alia kona-ba dansa kulturál hotu-hotu iha rai laran tenke mai husi identidade kultura Timor nian ho vizaun no misaun klaru. Por ezemplu, buat ne’ebé hatudu ona iha Dubai, ho tema prezerva no promove kultura orijenalidade, dook husi buat ne’ebé ema espera iha Timor-Leste.

Ezemplu idak ne’ebe ha’u nota ona durante surtu Covid-19 katak Sekretaria Estadu kultura iha duni programa paradaxika ne’ebé ha’u argumenta katak uza de’it plataforma kulturál hodi la sensura ka imajina  kona-ba posibilidade konsekuénsia iha futuru kuandu la tetu no halo planu didi’ak. Por ezemplu, programa rituál anti-Covid-19, ne’ebé hahú implementa iha Abríl no Maiu 2020, hanesan asaun retórika de’it, uza rituál tradisionál ne’ebé bazeia ba identidade Timor-Leste nian ne’ebé bele fó tendénsia kontráriu. Ida ne’e ezemplu ki’ik ida atu kompara planu adekuadu ministeriu kultura nian ne’ebe la mai ho planu efeitu, maibe ho konseitu ne’ebe laiha baze planu forte ka profundo.

Argumentu simples ida-ne’e hatudu lisaun ki’ik ida atu ita-nia governu, liu husi sekretáriu kultura no arte servisu hamutuk ho MCAE no ministeriu relevante sira atu redefine polítika kona-ba programa kulturál, hanesan saida mak sidadaun sira kritika iha média Nasionál kona-ba dansa kulturál iha expo Dubai. Tanba ne’e polítika ne’ebé la mai ho planu apropriadu no la inklui partisipasaun entidade sira hotu, ida-ne’e bele hafraku sosiedade nia fiar ba Governu katak planu no programa hotu-hotu mai husi governu nia interese deit, la liu husi prosesu konsultasaun, koodernasaun no partisipasaun sosiedade tomak. Ikus mai, sosiedade sira bele argumenta katak ekipa expo Dubai nia performansia la relevante no sira laiha kompeténsia atu promove Timor-oan nia identidade kultura iha rai li’ur. Nune’e mos bele mosu argumentu seluk katak identidade kultura Timor-Leste nia utiliza de’it ba konsumu interese polítiku sira nian de’it laos hointensaun atu “preserva, dezenvolve, no habelar” identidade lokal iham nivel global” liu husi eventu boot sira hanesan iha Expo Dubai.

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: