Fenomena Validade Dokumentu durante Estadu Emerjensia

Públiku bele interpreta ho hanoin ne’ebé skeptis, ka lakon fiar kona-ba oinsá Komandante polísia tránzitu ida-ne’ebé bele hatoo nia deklarasaun la tetu didiak, ho publikamente katak polísia sei halo pasa revista durante loron feriadu iha fulan Novembru nia laran hodi bele haree dokumentu prazu liu ona hanesan karta kondusaun no dokumentu kareta no motor. Maske iha periodu estadu emerjénsia nian, dekreto do governu no 23/2021, artigu 26 hakerek momos katak ” Durante mandatu diploma ida-ne’e nian, lisensa, autorizasaun sira no aktu Administrativu sira seluk no dokumentu sira-ne’e válidu nafatin sein haree ba tempu validade nian” no politiku nain (Sr Fidelis) hateten klaru ona katak dokumentu hotu-hotu ne’ebe prazu liu ona sei konsidera válidu durante Estadu emerjénsia.

Opiniaun badak ida-ne’e atu ilustra kona-ba fenomenu polísia nian atitude no desizaun ho maneira interpreta polítika no regulasaun Estadu emerjénsia ne’ebé aprova ona hosi Governu no Prezidente da Republika Timor-Leste. Importante atu subliña iha-ne’e, oinsá polísia nu’udar ofisiál ba aplikasaun lei ne’ebé fó deklarasaun públiku sein tetu didiak ho komprensaun kona-ba polítika publika, lei no regulamentu sira iha Timor-Leste, liu-liu relasiona ho Dekretu-Lei estadu emerjénsia no politika sira seluk ne’ebé relevante.

Fontes husi Tatoli

Haree ba atitude no reasaun públiku ne’ebé ladún iha konfiansa ba polísia Nasionál kona-ba sira-nia brutalidade tratamentu dezumanu ba sidadaun sira, obriga sosiedade sira atu hetan teste ba SWAP hanesan buat ne’ebé akontese iha fulan hirak liu ba, wanhira sidadaun sira lao iha dalan, polisia atua sira. Nune’e mos publiku julga Polisia sira hanesan ator moralistiku, nu’udar instituisaun morál, proibidu no kontrola ema nia movimentu ba halo rekreasaun iha tasi ibun,no hemu tua iha eventu espesiál (loron matebian), asuntu sira-ne’e hotu kontinua repete durante surtu COVID-19 hahú husi fulan Marsu 2020 to’o agora. Nasaun dia ne’e ita bele interpreta katak, tanba deit mosu krize saude mundial, fo previlejiu ba autor maker poder no seguransa sira hodi jere ho aproximasaun milistarismu ne’ebe la rekonese direitu fundamental cidadaun sira nian.

Opiniaun badak ida-ne’e ilustra oituan kona-ba deklarasaun Kosenllu Ministériu nian, Sr. Fidelis, nomoos Komandante polísia Nasionál iha midia Tepo no Tatoli iha semana ne’e. Sira-nia deklarasaun ne’e kontroversial tebes, halo sosiedade sira konfuzaun.

Idealmente, polísia atua, hala’o sira-nia knaar bazeia ba regulamentu no lei ne’ebé eziste iha Timor-Leste, relasiona ho servisu profisionál sira baasuntu segunrasa nia tuir sira nia kna’ar no tipu servisu nian. Porezemplu, polísia tránzitu, sira halo sira-nia knaar tuir lei, polítika publika no polítika Nasionál. Nune’e, durante implementasaun Estadu emerjénsia nian, deside tiha ona regulamentu balun nu’udar Dekretu-Lei ida-ne’ebé hatuur iha rejime Estadu emerjénsia nian.

Iha kestaun balun ne’ebé regula iha Dekretu-Lei ne’ebé kontinua hanaruk to’o agora (dala 19). Ezemplu, regulamentu tránzitu, ne’ebé oras ne’e hahú kedas husi Estadu emerjénsia dahuluk, Governu liu husi Dekretu-Lei ne’ebé sei nafatin hanesan to’o oras ne’e permite sidadaun hotu-hotu ne’ebé iha ona dokumentu inválidu sira hanesan, lisensa Negósiu, pasaporte no kareta no dokumentu motór no aktu administrativa seluk sira sei konsidera válidu durante períodu Estadu emerjénsia nian, tenik Sr Fidelis iha (Tempo Timor, 27/10/21). Aleinde ne’e iha dekreto do governo, no 23/2021, artigu 26 hakerek momos katak ” Durante mandatu diploma ida-ne’e nian, lisensa, autorizasaun sira no aktu Administrativu sira seluk no dokumentu sira-ne’e válidu nafatin sein haree ba tempu validade nian”Autorizasaun no aktu Administrativu sira seluk noDokumentu nafatin válidu la haree ba

Maibe iha opiniaun husi komandante polisia ida, halo ita atu hamnasa lerek, lao’s tanba iha cidadaun ida hasara iha media sosial dehan “ Polisia sira ne’e atu buka buat rahun alias buka osan bolsu mahar nian” maibe tanba komandante ne’e nia argumentu hanesan la uza lojika pensamentu ida ne’ebe bazeia ba lei ruma ka regulamentu estadu emerjensia nian, naran kolia deit buat ne’ebé iha nia kakutak. Oinsá mak Komandante polísia tránzitu ida deside rasik, la konsidera lei ne’ebé iha, ho brani to’o atu dehan katak iha feriadu Nasionál (1-2 Novembru), polísia sei halo pasa revista iha teritoriu tomak. Hanesan nota ona husi média Nasionál (Tatoli, 26/10/2021) no GMN TV, katak komandante polísia ne’e dehan, nia membru sei la tolera ho sidadaun sira ne’ebé lori karta kondusaun no veikulu no dokumentu motór ne’ebé liu ona prazu.

Regulamentu kona-ba validade dokumentu hotu-hotu ne’ebe hatuur iha dekretu lei ba estadu emerjensia nia klaru ona, maske dokumentu sira ne’e prazu liu tiha ona, sidadaun sira sei bele utiliza. Ida ne’e akontese durante kuaze tinan rua nia laran iha momentu surtu COVID-19, dokumentu hotu-hotu ne’ebe prazu liu tia ona mós konsidera hanesan regulamentu válidu?

Ba ha’u, ha’u la bele imajina ho rasional, oinsá Governu mai ho regulamentu ne’ebé klaru loos ne’ebé tuir loloos hanesan Sr. Magalaes hatete katak la iha kastigu ka multa ba dokumentu invalid sira, enkuantu núdar politiku na’in ida ne’ebe fo orientasaun politika no produz lei, polisia komande rasik la halo tuir, no situasaun ida ne’e konsidera hanesan retórika polítika de’it. Tanbasa mak la iha implementasaun uniforma husi atór polítiku sira iha Governu no atór implementador  lei no orden sira iha terenu.

Se konfusaun sira ne’e kontinua akontese no repete hela deit, hanesan buat ne’ebé hanesan mensiona iha leten, la konsistente, ikus mai ita nu’udar sidadaun simples ida-ne’ebé hala’o ita-nia kna’ar no atividade kumpri lei no regulamentu estadu emerjensia ba COVID-19 nian, ita bele dehan simplesmente katak iha implementasaun polítika no regulamentu balun ne’ebé ida-dak implementa tuir nia hakrak deit, mesmu hatene ka falta konesementu, la hatene buat ida kona-ba lei no polítika, bele fo justifikasaun klaru ba ita. Ita nudar sidadaun tenke tesi-lia, julga ba inkonsistensia implementasaun politika, regulamentu ne’ebe la apa’ar ba malu, hanesan kazu Polisia sei la fo toleransia ba dokumentu sim no kareta nian iha durante feriadu Finadu nian, situasaun ne’e ita bele hatete, entre polisia mak lahatene le’e ka, interpreta lei, ka politku nain hanesan Fidelis mak kanta hela hananu retorika politika drama inkonsistensia ne’e halo ita povu lanu hanesan ema beik, bilan iha situasaun oin lanu.

Published by Celso Da Fonseca

I'm just a dreamer who enjoys my freedom. Freethinker, free writer, and free dream.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: